Gal 6 | GbrGAW | STEP | Omi azaje, ndei Yesu viyi wa zhin laifi ho, ofye nfye ce zhi n Gyi-gyi-yi nyi, fya bma wo zhin fya jeze ɓe n woi, n na atnayi n zokwo manayi, fyei pa nfyehin ge kpekni nsu fye ɓei ka laifi zhin.

Galatians 6

1 Omi azaje, ndei Yesu viyi wa zhin laifi ho, ofye nfye ce zhi n Gyi-gyi-yi nyi, fya bma wo zhin fya jeze ɓe n woi, n na atnayi n zokwo manayi, fyei pa nfyehin ge kpekni nsu fye ɓei ka laifi zhin. 2 Fye wo aje akaya, fya bma aje zhin dna n wahala, kwo damuwa, nlonu fye vi yi Dagayi owa. 3 N zaho gye ge wo du wyi lo wa zhin lonu, wo dna wohin kwoce nu, wo to zhin nyaho nun.

4 Zaho-zahoi la tabata ge wo zihn hakuri lo n ɓemana zhin, n na bai nu n wo ɓa bwa bugba da, to wa zhin atna wa mwi wohin do n zado yin. 5 Ozaho-zahoi n yi mi tile wa lawo alaifi kaya, ntuge zaho to lo n wo nu ngun awon.

6 Aza n na wuɓa Shekwoyi ɓeda kow bimya ɓa bma ʼɓa malami zhin ɓa gba wo.

Fye To Gmi Bugba Yam

7 Fye to ye a dna fye kwocen, fye pa, hota ya Shekwoyi na vun yi fya bwa lafiya n. Oza ɓa bwa nyanu do nwa bye. 8 Nwa bye ge wa fu wohin aɓo pwawo nukwoyi bugba nu, wo ɓo bye nyabye nukwoyi nu, woi ɓo do nya ɓwodo zafun nya n ʼfiyi. Ama nwa bye nyabye manayi Zafun nya wo ɓa do wye-wyei nyalo-nyalo nya. N Zafun Gyi-gyi-yi ɓa gawo. 9 Ato ɓeyi n ɓemana zhin yin, gma safyewyi yi ɓa do anabarka n yi to bma bugbaya ya fan. 10 Cenu zhin esa vinya n yi ɓami ya bma aza zhin, tun ba ga eyi a Yesu viyi aje.

11 Miɓa kma ɓedaye ka n mi abwayi fye gye shi mi kanya nsun-sun. 12 Ofye amalami hi nɓa zhin atna ɓa zhin fye fya zhin kaciya nyi, ɓa zhin lonu ntu n nya gmanyi ɓo nu: N na bai n na ɓa kpeɓa ye, to ɓa sin wahala ɓai ya ye ge Kristi zundu gmanyi nu gni azan. 13 A Malami hi nɓa vi kaciya nyi, ɓa ta shi a Yahudiyi awyidna bwan, ama, ɓaye fya zhin kaciya n nabai ɓa zhin aɓokwo nge fye zhin ɓa bara nu.

14 Nmi aba dai Shekwoyi kiyaye ma mwa mihin tukwo, sai dai dna Dagayi Yesu Kristi zundu mi. Ntu ge n zundu aba nu emi shakpe anyi da nya ɓei la duya tunyi n sapa, anyi ɓoda n kwo dna-mi nyi ɓola fi. 15 Kwo to shan do lo m, kwo ai ya zhin yi kaciya ko to ai zhin yin, oɓo dnagmayi gmanyi kwonu ge, kwo alai shan ma, yi ku ze aza woi-woi.

16 Shekwoyi sun-sungye n bugba fuyi ɓa kunsun n fyei, nfye wan zokwoye na zayi nɓa zhin Shekwoyi a nya na baho-bahoi vinya. 17 Nsaiye, fye to shan dami n miyi ntu n na ɓeye tukwon, gama mi n na aci gusayi kpelo n mi nayi n na Yesu anuwun yi ɓei lumi ntu n wo ɓo, kwa wunu ge mi zhin wo fyenu nu.

18 Omi azaje ye-yei, Eyi Dagayi Yesu Kristi alheri ɓa kunsun n fyei vinya. Amin.